PaperDabba News Desk: July 23, 2024
కేటీఆర్: కేంద్ర బడ్జెట్ పై ఘాటుగా స్పందించిన తెలంగాణ రాష్ట్ర సమితి వర్కింగ్ ప్రెసిడెంట్
కేంద్ర బడ్జెట్ పై ఘాటుగా స్పందించారు భారత రాష్ట్ర సమితి వర్కింగ్ ప్రెసిడెంట్ కేటీఆర్. బడ్జెట్ లో తెలంగాణ రాష్ట్రానికి పెద్దపీట వేయకపోవడంపై ఆయన తీవ్ర ఆగ్రహం వ్యక్తం చేశారు. “తెలుగు కోడలు నిర్మలా సీతారామన్ గారు తెలంగాణ రాష్ట్రానికి భారీ నిధులు కేటాయిస్తారని ఆశించాం. కానీ దక్కింది శూన్యం,” అని ఆయన అన్నారు.
కేంద్ర ప్రభుత్వం రూ. 48 లక్షల కోట్లతో బడ్జెట్ పెట్టినప్పటికీ కేవలం కొన్ని రాష్ట్రాలకు మాత్రమే పెద్దపీట వేశారని కేటీఆర్ ఆవేదన వ్యక్తం చేశారు. తెలంగాణ ప్రస్తావన లేకపోవడం బాధాకరమని, మరోసారి తెలంగాణకు గుండు సున్నానే దక్కిందని పేర్కొన్నారు.
తెలంగాణ పై కేంద్రం నిర్లక్ష్యం
ఆంధ్రప్రదేశ్ పునర్విభజన చట్టంలో దాదాపు 35 హామీలపై నిర్ణయం తీసుకోవాలని కేసీఆర్ గారు కేంద్రానికి విజ్ఞప్తి చేసినప్పటికీ, కేంద్రం పట్టించుకోలేదని కేటీఆర్ చెప్పారు. ములుగు యూనివర్సిటీకి అదనపు నిధులు, బయ్యారం స్టీల్ ఫ్యాక్టరీ, కాజీపేటలో రైల్వే కోచ్ ఫ్యాక్టరీ వంటి వాటికి నిధులు ఇవ్వకపోవడం కేంద్రం నిర్లక్ష్యానికి నిదర్శనమని తెలిపారు.
రాష్ట్రంలోని సాగునీటి ప్రాజెక్టులకు జాతీయ హోదా ఇవ్వాలని ఎన్నిసార్లు అడిగినా, కేంద్రం స్పందించకపోవడం దురదృష్టకరమని పేర్కొన్నారు. ఐఐఎం వంటి నేషనల్ ఇన్ స్టిట్యూట్స్ కోసం అడిగినా, ఒక్కటిని కూడా తెలంగాణకు కేటాయించకపోవడం చాలా బాధాకరమని అన్నారు.
ప్రత్యేక నిధులు: తెలంగాణకు నో చెప్పిన కేంద్రం
తెలంగాణ నుంచి ముంబై-నాగపూర్, బెంగళూరు-చెన్నై మార్గాల్లో పారిశ్రామిక కారిడార్లకు నిధులు అడిగినప్పటికీ, వాటికి స్పందన లేకపోవడం నిరాశ కలిగించిందని కేటీఆర్ అన్నారు. మెగా పవర్ లూమ్ క్లస్టర్ తో పాటు, నూతన హ్యాండ్లూమ్ క్లస్టర్ ఏర్పాటు చేయాలని అడిగినా కేంద్రం స్పందించకపోవడం దురదృష్టకరమని తెలిపారు.
కేంద్ర బడ్జెట్ పై తెలంగాణ ముఖ్యమంత్రి, మంత్రులు వెళ్లి ఢిల్లీలో అడిగినా, కేంద్రం పట్టించుకోలేదని, తెలంగాణకు మరోసారి గుండుసున్నా దక్కిందని ఆవేదన వ్యక్తం చేశారు.
జాతీయ పార్టీల వైఫల్యం
తెలంగాణలో 16 స్థానాలను బీజేపీ, కాంగ్రెస్ వంటి జాతీయ పార్టీలకు ఇస్తే ఏం జరిగిందో ప్రజలు ఆలోచించాలన్నారు. 16 స్థానాలు ఉన్న ఆంధ్రప్రదేశ్, బీహార్ లకు దక్కిన నిధులను చూసినా, తెలంగాణ ప్రజలు ఆలోచన చేయాలన్నారు. స్వీయ రాజకీయ అస్తిత్వమే తెలంగాణకు శ్రీరామ రక్ష అని అర్థం చేసుకోవాల్సిన అవసరముందని, ఈ ఘటన మాకు తెల్పుతోందన్నారు.
పార్లమెంట్లో కూర్చున్న బీజేపీ, కాంగ్రెస్ ఎంపీలు కేంద్ర మంత్రులు ఒక్క మాట కూడా మాట్లాడకపోవడం బాధాకరమన్నారు. గులాబీ కండువా కప్పుకున్న ఎంపీలు ఉంటే, కేంద్ర వ్యతిరేక వైఖరిని గట్టిగా వ్యతిరేకించేవారు అన్నారు.
ఆంధ్రప్రదేశ్ నిధులు: స్పందన
ఆంధ్రప్రదేశ్ కు ఎక్కువ నిధులు ఇచ్చినందుకు మాకు బాధ లేదని, వారు బాగుండాలని కోరుకుంటున్నామని అన్నారు. కానీ మిగిలిన 26 రాష్ట్రాలను చిన్న చూపు చూడడం బాధాకరమన్నారు. ఆంధ్రప్రదేశ్ పునర్విభజన చట్టం పేరు చెప్పిన ప్రతిసారి తెలంగాణ డిమాండ్లను పట్టించుకోలేదని ఆవేదన వ్యక్తం చేశారు.
ఈ సంఘటనలన్నింటితో, తెలంగాణకు స్వీయ రాజకీయ శ‌క్తిగా నిలబడాల్సిన అవసరం మరింత స్పష్టమైంది.
