PaperDabba News Desk: జులై 20, 2024
కన్నడ బుల్లితెర దర్శకుడు వినోద్ ధోండాలే తన నివాసంలో ఉరేసుకొని ఆత్మహత్య చేసుకున్నారు. నాగరబావిలోని ఆయన నివాసంలో ఈ ఘటన చోటుచేసుకోవడం ఇండస్ట్రీలో తీవ్ర దిగ్భ్రాంతిని కలిగించింది. కలర్స్ కన్నడ ఛానెల్‌లో ప్రసారం అవుతున్న ‘కరిమణి’ సీరియల్‌ను ఆయనే దర్శకత్వం వహించడమే కాకుండా, సతీష్ నీనాసం హీరోగా తెరకెక్కుతున్న ‘అశోక్ బ్లేడ్’ సినిమాను కూడా ఆయన తెరకెక్కిస్తున్నారు. షూటింగ్ చివరి దశలో ఉండగా ఆయన ఆత్మహత్య చేసుకోవడం చిత్ర బృందం షాక్‌కు గురైంది.
శోకసంద్రంలో కుటుంబం
వినోద్ ధోండాలే మృతి పట్ల ఆయన కుటుంబం, స్నేహితులు, సహచరులు తీవ్ర శోకసంద్రంలో మునిగిపోయారు. ఆయనకి భార్య, ముగ్గురు పిల్లలు ఉన్నారు. ‘అశోక్ బ్లేడ్’ సినిమా చిత్ర బృందం కూడా ఆయన మృతితో దిగ్భ్రాంతికి గురైంది.
ఇండస్ట్రీపై ప్రభావం
వినోద్ ధోండాలే తన క్రియేటివ్ దృష్టితో సరికొత్త కథలు తెరపైకి తీసుకువచ్చారు. ఆయన ఆకస్మిక మృతి కన్నడ టెలివిజన్, సినిమా రంగంలో తీవ్ర నిరాశ మిగిల్చింది. నటులు, నటీమణులు మరియు సాంకేతిక సిబ్బంది సోషల్ మీడియాలో ఆయనపై తమ సంతాపాన్ని తెలియజేస్తున్నారు. ప్రతిభావంతుడు, అంకితభావంతో పని చేసే దర్శకుడిగా ఆయనకి మంచి గుర్తింపు ఉంది.
అనుమానాలు మరియు దర్యాప్తు
పోలీసులు ఈ ఘటనపై దర్యాప్తు ప్రారంభించారు. ఆత్మహత్య అని ప్రాథమిక సమాచారం ఉన్నప్పటికీ, దీని వెనుక ఉన్న కారణాలు ఇంకా తెలియరాలేదు. కుటుంబ సభ్యులు, సన్నిహితుల్ని ప్రశ్నించారు మరియు ఆయన పనిలో ఉన్న ఒత్తిడి అంశాలను కూడా పరిశీలిస్తున్నారు పోలీసులు .
