PaperDabba News Desk: జూలై 19, 2024
వినుకొండ హత్యపై ఎమ్మెల్యే ఆంజనేయుల స్పందన
పల్నాడు జిల్లా వినుకొండలో జరిగిన హత్య ఘటనపై ఎమ్మెల్యే జీవీ ఆంజనేయులు తీవ్ర ఆగ్రహం వ్యక్తం చేశారు. వ్యక్తిగత కక్షలతో జరిగిన ఈ హత్యను రాజకీయ పార్టీలకు ముడిపెట్టడం సరికాదని ఆయన మండిపడ్డారు. వైకాపా నేతలు శవరాజకీయాలు మానుకోవాలని హెచ్చరించారు.
మాజీ ఎమ్మెల్యే బ్రహ్మనాయుడుపై ఆరోపణలు
మృతుడు రషీద్‌, నిందితుడు జిలానీ ఇద్దరూ వైకాపాకు చెందిన వ్యక్తులేనని, వారిపై కేసులున్నాయని తెలిపారు. వారిద్దరి మధ్య ఉన్న వైరాన్ని వైకాపా మాజీ ఎమ్మెల్యే బొల్లా బ్రహ్మనాయుడు, ఆయన అనుచరుడు ఖాన్‌ పెంచి పోషించారని ఆరోపించారు. జిలానీ ఇంటిపై రషీద్‌ దాడి చేసినప్పుడే కఠినంగా వ్యవహరించి ఉంటే ఈ హత్య జరిగేది కాదన్నారు. బ్రహ్మనాయుడు ఎమ్మెల్యేగా ఉన్న సమయంలో గంజాయిని ప్రోత్సహించడం వల్లే నియోజకవర్గంలో ప్రస్తుతం దారుణాలు జరుగుతున్నాయని ధ్వజమెత్తారు.
నిందితులపై కఠిన చర్యల కోరింపు
ఈ ఘటనకు సంబంధించి నిందితులపై కఠిన చర్యలు తీసుకోవాలని పోలీసు ఉన్నతాధికారులను ఎమ్మెల్యే జీవీ ఆంజనేయులు కోరినట్లు తెలిపారు. వినుకొండ చెక్‌పోస్టు సెంటర్‌లో నడిరోడ్డుపై అందరూ చూస్తుండగానే రషీద్‌పై జిలానీ కత్తితో విచక్షణ రహితంగా దాడి చేసి హత్య చేశాడు. ఈ ఘటనలో రషీద్‌ రెండు చేతులు తెగిపోయాయి. తీవ్రగాయాలతో బాధితుడు మృతి చెందాడు.
ఎమ్మెల్యే జీవీ ఆంజనేయులు ఇలాంటి ఘటనలు పునరావృతం కాకుండా నివారించేందుకు, ప్రాంతంలో శాంతి పునరుద్ధరణ కోసం తక్షణమే కఠిన చర్యలు తీసుకోవాల్సిన అవసరాన్ని నొక్కి చెప్పారు.
