రాజంపేట ఎంపీపై దాడి హేయం – తిరుపతి ఎంపీ గురుమూర్తి తీవ్ర ఖండన

PaperDabba News Desk: 2024-07-18

రాజంపేట ఎంపీ పెద్దిరెడ్డి మిదున్ రెడ్డిపై జరిగిన దాడిని తిరుపతి ఎంపీ గురుమూర్తి తీవ్రంగా ఖండించారు.

మిదున్ రెడ్డిపై దాడి అత్యంత హేయం

తెలుగుదేశం పార్టీ నేతల దాడిలో గాయపడిన వారిని పరామర్శించేందుకు పుంగనూరులోని మాజీ ఎంపీ రెడ్డెప్ప నివాసానికి వెళ్లిన మిదున్ రెడ్డిపై దాడి చేయడం అత్యంత హేయమైన చర్యగా గురుమూర్తి అభివర్ణించారు. ప్రజాస్వామ్య బద్దంగా ఎన్నికైన ఒక పార్లమెంట్ సభ్యునికే రక్షణ కల్పించలేని ప్రభుత్వం సామాన్య కార్యకర్తలకు ఏ విధమైన రక్షణ కల్పిస్తుందని ప్రశ్నించారు.

ప్రభుత్వంపై మండిపడ్డ గురుమూర్తి

ఒక ఎంపీపై రాళ్ల దాడి చేస్తుంటే రక్షణ కల్పించాల్సిన పోలీసులే చోద్యం చూస్తుంటే ఏ విధమైన ఆటవిక పాలన కొనసాగుతుందో అర్థం చేసుకోవాలని ఆయన అన్నారు. గతంలో ఎన్నడూ లేని విధమైన సంస్కృతిని నేటి పాలనలో చూస్తున్నామన్నారు.

ప్రజాస్వామ్యంపై తీవ్ర దెబ్బ

అధికారం శాశ్వతం కాదు అనేది గుర్తుంచుకోవాలన్నారు. నేడు మీ వెనుక ఉండి దాడులకు ప్రోత్సహించే నాయకులూ, నాడు ఎవరూ ఉండరని, ప్రజాస్వామ్య పద్ధతుల్లోనే సమస్యలను పరిష్కరించుకోవాలని సూచించారు.

ఈ ఘటనపై ప్రజలు, నాయకులు తీవ్ర ఆగ్రహం వ్యక్తం చేశారు. ప్రజా ప్రతినిధులపై ఇలాంటి దాడులు జరగకుండా తీసుకోవాల్సిన చర్యలపై ప్రభుత్వం చొరవ చూపాలని పిలుపునిచ్చారు.