పేపర్‌డబ్బా న్యూస్ డెస్క్ – 2024 జూలై 9. సీఎం చంద్రబాబు నాయుడు అధ్యక్షతన సచివాలయంలో జరిగిన 227వ స్టేట్ లెవల్ బ్యాంకర్స్ కమిటీ (SLBC) సమావేశంలో 2024-25 ఆర్థిక సంవత్సరానికి గాను వివిధ ప్రాధాన్య రంగాల కోసం సమగ్ర రుణ ప్రణాళికను ప్రకటించారు.
SLBC మీటింగ్ ముఖ్యాంశాలు
సచివాలయంలో జరిగిన SLBC సమావేశంలో ముఖ్యమంత్రి చంద్రబాబు నాయుడు ప్రధాన నేతృత్వం వహించారు. ఈ సమావేశంలో 2024-25 ఆర్థిక సంవత్సరానికి గాను రూ.5,40,000 కోట్ల రుణ ప్రణాళికను విడుదల చేశారు. ఇందులో రూ.3,75,000 కోట్లు ప్రాధాన్య రంగాలకు, రూ.1,65,000 కోట్లు ఇతర రంగాలకు కేటాయించారు.
వ్యవసాయ రంగంపై దృష్టి
వ్యవసాయ రంగం కోసం రూ.2,64,000 కోట్లు కేటాయించబడింది. గత ఏడాదితో పోల్చితే 14% పెరుగుదల. డైరీ, పౌల్ట్రీ, ఫిషరీస్, వ్యవసాయ యాంత్రీకరణ, వ్యవసాయ మౌళిక సదుపాయాలకు రూ.32,600 కోట్ల రుణ ప్రణాళిక కలదు.
గత ఏడాది ప్రాధాన్య రంగాలకు రూ.3,23,000 కోట్లు కేటాయించబడగా, వ్యవసాయ రంగం కోసం రూ.2,31,000 కోట్లు మంజూరయ్యాయి. అందులో 90% అనగా రూ.2,08,136 కోట్ల రుణాలు మంజూరయ్యాయి. ఈ ఏడాది ప్రాధాన్య రంగాలకు 16% పెరుగుదలతో మొత్తం రూ.3,75,000 కోట్ల లక్ష్యం.
MSME మరియు గృహ రుణాలు
ఉద్యోగ మరియు ఉపాధి కల్పనకు దోహదపడే MSME రంగం కోసం రుణ లక్ష్యం 26% పెరిగింది. 2023-24 లో రూ.69,000 కోట్లు కేటాయించబడగా, 2024-25 లో రూ.87,000 కోట్లు లక్ష్యం. అలాగే, గృహ నిర్మాణానికి రూ.11,500 కోట్లు, సాంప్రదాయ ఇంథన రంగానికి రూ.8,000 కోట్లు రుణ ప్రణాళిక సిద్ధం చేశారు.
ప్రభుత్వం మరియు బ్యాంకర్ల సహకారం
5 ప్రధాన అంశాలపై మెరుగైన ఫలితాలు సాధించేందుకు రాష్ట్ర ప్రభుత్వం మరియు బ్యాంకర్లు సబ్ కమిటీలను ఏర్పాటు చేసారు. సాగు ఖర్చులు తగ్గించడం, కౌలు రైతులకు రుణాలు అందించడం, పంటల బీమా మెరుగుపరచడం, పి4 విధానం ద్వారా పేదరిక నిర్మూలన, డిజిటల్ లావాదేవీలను ప్రోత్సహించడం, స్కిల్ డవల్మెంట్, జి.డి.పి పెంచే రంగాలకు ప్రోత్సాహం వంటి అంశాలు ఇందులో ఉంటాయి.
ఈ సమావేశంలో ఆర్థిక మంత్రి పయ్యావుల కేశవ్, వ్యవసాయ శాఖా మంత్రి అచ్చెన్నాయుడు, యూనియన్ బ్యాంక్ ఎక్జిక్యూటివ్ డైరెక్టర్ సంజయ్ రుద్ర, ఎస్.ఎల్.బి.సీ కన్వీనర్ సీవిఎన్ భాస్కర్ రావు, ఇతర బ్యాంకు మరియు వివిధ శాఖల అధికారులు పాల్గొన్నారు.
2024-25 ఆర్థిక సంవత్సరానికి ఎస్.ఎల్.బి.సీ విస్తృత రుణ ప్రణాళిక, వ్యవసాయం మరియు MSME లకు ప్రాధాన్యత ఇస్తూ ఆంధ్రప్రదేశ్ ఆర్థిక వృద్ధికి దోహదపడుతుంది. రాష్ట్ర ప్రభుత్వం మరియు బ్యాంకర్ల సహకారంతో ఈ రంగాలలో మెరుగైన అభివృద్ధిని సాధించేందుకు సన్నాహాలు జరుగుతున్నాయి.
