బిర్యానీ రైస్ బాత్రూంలో క్లీనింగ్, సిద్ధిపేటలో ఓ రెస్టారెంట్ నిర్వాకం!

Siddipet News : బిర్యానీ పేరు చెప్పగానే నోట్లో నీళ్లూరుతాయ్ చాలా మందికి. రెస్టారెంట్స్ వెళ్లే వారు ఎక్కువగా బిర్యానీనే ఆర్డర్ చేస్తారు. ఈ ఏడాది రంజాన్ సీజన్ లో హలీమ్ కన్నా ఎక్కువగా బిర్యానీ ఆర్డర్స్ వచ్చాయని ఫుడ్ డెలివరీ సంస్థలు తెలిపాయి. అలాంటి బిర్యానీ గురించి ప్రత్యేకంగా చెప్పనక్కర్లేదు. అయితే సిద్ధిపేటలో జరిగిన ఈ ఘటన చూస్తే… బిర్యానీ పేరు చెబితే కాస్త ఆలోచించాల్సి ఉంటుంది. బిజీ లైఫ్ లో బయటి ఫుడ్ కు అలవాటు పడిన జనాలు… టిఫిన్ నుంచి ఫుడ్ వరకూ అన్నీ రెస్టారెంట్ నుంచే. ఫుడ్ డెలివరీ యాప్స్ వచ్చాక కనీసం రూమ్ నుంచి బయటకు వెళ్లకుండానే ఫుడ్ ఇంటికి వచ్చేస్తుంది. అన్నీ బాగానే ఉన్నాయ్ కానీ ఆ ఫుడ్ ను హోటల్స్ యాజమాన్యం పరిశుభ్ర వాతావరణంలో తయారు చేస్తున్నారా అంటే సందేహించాల్సిందే. సిద్ధిపేటలో ఓ హోటల్ యాజమాన్యం నిర్వాకం తాజాగా వైరల్ అవుతోంది.   

బిర్యానీ రైస్ బాత్రూంలో క్లీనింగ్ 

సిద్దిపేటలోని సోని రెస్టారెంట్‌లో బిర్యానీ తినేందుకు ఓ కస్టమర్ వెళ్లాడు. బిర్యానీ ఆర్డర్ ఇచ్చి హ్యాండ్స్ వాష్ చేసుకునేందుకు వెళ్లగా.. అక్కడ ఓ ఘటన చూసి వాంతులు చేసుకునే పరిస్థితిలో బయటకు వచ్చాడు. బిర్యానీ వాడే రైస్ ను కిచెన్ లో వాటర్ రావడం లేదని బాత్రూంలో కడుగుతూ కస్టమర్లకు అడ్డంగా దొరికారు. ఈ విషయంపై యాజమాన్యాన్ని అడిగితే మోటర్ కాలిపోయింది, వాటర్ ప్రాబ్లం ఉందని రెస్టారెంట్ నిర్వాహకులు సమాధానం ఇవ్వడం ఇక్కడ కొసమెరుపు. దీంతో ఈ రెస్టారెంట్ లో తినడానికి వచ్చిన మాదే తప్పు అని లెంపలేసుకుని కస్టమర్లు అక్కడ నుంచి వెళ్లిపోయారు. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతుంది. ఇంట్లో ఫుడ్ వద్దు బయటి ఫుడ్ ముద్దు అనుకునే వాళ్లకు ఈ వీడియో తప్పకుండా చూపించాలంటున్నారు నెటిజన్లు.

హైదరాబాద్ లో బిర్యానీ అమ్మకాల రికార్డు

ఈ రంజాన్ సీజన్ లో హైదరాబాద్ బిర్యానీ, హ‌లీమ్ అమ్మకాలు దుమ్మురేపాయి. కొత్త రికార్డులు సృష్టించాయి. రంజాన్ సందర్భంగా హైదరాబాద్ లో ఒక మిలియ‌న్ బిర్యానీ,  4 ల‌క్షల హలీమ్ ఆర్డర్లు  వ‌చ్చాయి. రంజాన్ సందర్భంగా హలీమ్, చికెన్ బిర్యానీ, సమోసా వంటి సంప్రదాయ వంటకాలకు ఎక్కువగా ఆర్డర్లు వచ్చాయని వ్యాపారస్తులు తెలిపారు.  ఈ రంజాన్ సీజన్ లో స్విగ్గీలో ఒక మిలియన్ బిర్యానీలను ఆర్డర్ చేసినట్లు తాజా నివేదిక పేర్కొంది. స్విగ్గీ మార్చి 23 నుంచి ఏప్రిల్ 18 వరకు వచ్చిన ఆర్డర్లను విశ్లేషిస్తే… హలీమ్ కు 4 లక్షలకు పైగా ఆర్డర్లు వచ్చాయి. గత ఏడాది ఇదే కాలంతో పోలిస్తే బిర్యానీ ఆర్డర్ల సంఖ్య 20 శాతం పెరిగాయని స్విగ్గీ తెలిపింది. ఇఫ్తార్ విందులో ఉండే సమోసాలు, భజియాలతో పాటు ఖర్జూరాలతో చేసిన వంటకాలు ఉన్నాయని నివేదిక తెలిపింది. భజియాలకు ఆర్డర్లు 77 శాతం పెరిగాయన్న స్విగ్గీ…. మటన్ హలీంతో పాటు చికెన్, పాలమూరు పోటెల్, పర్షియన్ స్పెషల్ హలీమ్, డ్రై ఫ్రూట్ హలీమ్ సహా మరో తొమ్మిది రకాల హలీమ్ లకు డిమాండ్ భారీగా పెరిగిందని స్పష్టం చేసింది.