- ఫోన్ పోయిందా! పేటీఎం, గూగుల్ పే, ఫోన్‌పే ఖాతాలను ఆపండిలా..
ఏం కొన్నా.. తిన్నా.. ఇప్పుడు అంతా యూనిఫైడ్ పేమెంట్స్ ఇంటర్‌ఫేస్ (యూపీఐ) చెల్లింపులే చేస్తున్నారు. చిన్న టీకొట్టు నుంచి దుకాణాల వరకు ఎక్కడ చూసినా వీటి ద్వారానే ఎక్కువగా లావాదేవీలు జరుగు తున్నాయి. ప్రతీ ఒక్కరికీ స్మార్ట్‌ఫోన్ ఉండటం, మొబైల్ ఇంటర్నేట్ అందుబాటులోకి రావడంతో పేటీఎం, గూగుల్ పే, ఫోన్ పేల వినియోగం పెరిగిపోయింది మరి. నేషనల్ పేమెంట్స్ కార్పొరేషన్ ఆఫ్ ఇండియా ( ఎన్‌పీసీఐ) లెక్కల ప్రకారం గత ఏడాది డిసెంబర్‌లో ఏకంగా 782 బిలియన్ రూపాయల విలువైన యూపీఐ ట్రాన్సాక్షన్లు జరిగాయి. అయితే, మోసాలు అంతే స్థాయిలో జరుగుతున్నాయి. స్మార్ట్‌ ఫోన్‌ను పోగొట్టుకున్నవారిలో చాలా మంది ఖాతాల నుంచి నగదు మాయమవుతున్నట్ల సంఘటనలు వెలుగులోకి వస్తూనే ఉన్నాయి. మన బ్యాంకు ఖాతాలతో అనుసంధానమైన పేటీఎం, గూగుల్ పే, ఫోన్ పే వంటి యూపీఐ యాప్స్ ద్వారానే ఈ నష్టం వాటిల్లుతున్నది. కాబట్టి ఫోన్ పోయిందని తెలిసిన వెంటనే అందులోని యూపీఐ యాప్స్‌ని పనిచేయకుండా బ్లాక్ చేయాలి. ఇది ఎలాగంటే..
ఈ మార్గదర్శకాలను అనుసరించాలి..
- ఫోన్ పోయినట్లు తెలిసిన వెంటనే యూపీఐ యాప్స్ కస్టమర్ కేర్ సాయం తీసుకోవాలి.
- ఫోన్ పోయిందన్న ఆప్షన్‌ను తీసుకోవాలి.
- వేరే ఫోన్ నంబర్‌ను ఎంటర్ చేసి, పోయిన ఫోన్ నంబర్‌ను బ్లాక్ చేయాలని తెలియపరచాలి.
- అన్ని డివైజ్‌ల ఆప్షన్ నుంచి లాగౌట్ ఎంచుకోవాలి.
గూగుల్ పే వాడే వారు..
గూగుల్ పే వారు తమ ఫోన్ పోగొట్టుకున్న సమయంలో కస్టమర్ కేర్ నంబర్ 18004190157 కు కాల్ చేసి అకౌంట్‌ను బ్లాక్ చేసుకోవచ్చు. ఫోన్ చేసిన తర్వాత అదర్ ఇష్యూస్ అనే ఆప్షన్ ఎంచుకోవాలి. తర్వాత స్పెషలిస్ట్‌తో మాట్లాడాలనే ఆప్షన్ ఎంపిక చేసుకోవాలి. అకౌంట్ బ్లాక్ చేయాలని తెలియజేయాలి. దీని కన్నా ముందే మీరు మీ గూగుల్ అకౌంట్ రిజిస్టర్డ్ మొబైల్ నెంబర్‌ను చెప్పాల్సి ఉంటుంది.
పేటీఎం..
పేటీఎం అధికారిక వెబ్‌సైట్‌ను సందర్శించి, ఫోన్ పోయిందన్న సమాచారాన్ని ఇచ్చి వినియోగదారులు తమ ఖాతాను తాత్కాలికంగా బ్లాక్ చేసుకోవచ్చు. ఈ క్రమంలో కస్టమర్లు తమ డెబిట్ లేదా క్రెడిట్ కార్డుస్టేట్‌మెంట్ లేదా ఎస్‌ఎంఎస్‌ను సమర్పించాల్సి ఉంటుంది. వేరే ఫోన్‌తో పేటీఎం లోకి లాగిన్ అవ్వాలి. ప్రొఫైల్ సెట్టింగ్స్‌లోకి వెళ్లాలి. ఇక్కడ మీకు చాలా ఆప్షన్లు లభిస్తాయి. ఇందులో సెక్యూరిటీ అండ్ ప్రైవసీ ఆప్షన్ ఎంచుకోవాలి. తర్వాత మేనేజ్ అకౌంట్స్ ఆన్ ఆల్ డివైసెస్ అనే ఆప్షన్‌పై క్లిక్ చేయాలి. తర్వాత అన్ని డివైజ్‌ల నుంచి లాగ్ ఔట్ అనే ఆప్షన్ ఎంచుకోవాలి. అప్పుడు మీరు అన్ని ఫోన్లలోని పేటీఎం అకౌంట్ల నుంచి లాగ్ ఔట్ అయిపోతారు. లేదంటే 01204456456 నెంబర్‌కు కాల్ చేసి ఫోన్ పోయిందనే ఆప్షన్ ఎంచుకోవాలి. ఇప్పుడు వేరే మొబైల్ నెంబర్ ఎంటర్ చేయాల్సి ఉంటుంది. తర్వాత మిస్ అయిన ఫోన్‌లో ఉన్న నెంబర్ ఎంటర్ చేయాలి. అప్పుడు మీరు డివైజ్‌లలోనూ పేటీఎం నుంచి లాగ్ ఔట్ అవుతారు. తత్కాలికంగా అకౌంట్ బ్లాక్ చేయాలని భావిస్తే.. అప్పుడు పేటీఎం వెబ్‌సైట్‌లోకి వెళ్లి 24 గంటల హెల్ప్ అనే ఆప్షన్ ఎంచుకోవాలి. ఫ్రాడ్ రిపోర్ట్ సెలెక్ట్ చేసుకోవాలి. అప్పుడు పేటీఎం మీ అకౌంట్‌ను బ్లాక్ చేస్తుంది.
ఫోన్ పే..
ఫోన్ పే వాడుతూ ఉంటే.. అప్పుడు 08068727374 లేదా 02268727374 నెంబర్లకు కాల్ చేయాలి. ఇప్పుడు కస్టమర్ కేర్ ప్రతినిధితో మాట్లాడటానికి ప్రయత్నించాలి. మీరు మొబైల్ నెంబర్, చివరి ట్రాన్సాక్షన్ వివరాలు, ఈమెయిల్ ఐడీ వంటి వివరాలు అందించాల్సి ఉంటుంది. తర్వాత మీ అకౌంట్ బ్లాక్ అవుతుంది. డేటా రక్షణ ఇలా.. స్మార్ట్‌ ఫోన్‌ను పోగొట్టుకున్న వారు ఆండ్రాయిడ్ వినియోగదారులైతే android.com/find ద్వారా తమ డేటాను దుర్వినియోగం కాకుండా అడ్డుకోవచ్చు. మీ జీమెయిల్ ఖాతా తెరిచి, స్మార్ట్‌ఫోన్ పోయిందన్న ఆప్షన్‌ను ఎంచుకోవాలి. అలాగే యాపిల్ (ఐవోఎస్) కస్టమర్లు Find App ద్వారా ఫోన్ డేటాను సంరక్షించుకోవచ్చు.